Jæja er búin að vera á námskeiði frá 7.nóv til 18 nóv í að læra fasteignafræði, tók prófið í dag þann 23.nóv og náði því. Nú er að taka Stateprófið á laugardag og sjá hvernig það gengur. Þetta var ekki svo erfitt en ég náttúrulega lærði eins og minni kynslóð er von og visa, við ætlum að standa okkur og hana nú.  Síðan er vinna uppá flugvelli sem verður greiniega mjðg spennandi líka. Ég verð nú reyndar bara nýbyrjuð að vinna þegar ég fer heim að sjá nýjasta fjölskyldumeðliminn sem samkvæmt sónar er annar drengur hjá Freyju og Steina bara gaman. Ef hann verður eitthvað líkur Heiðari þá verður hann bara skemmtilegur og fallegur. Ef ég fæ ekki frí þá bara hætti ég í vinnunni og læt minn vinna fyrir mér eins og hann hefur gert hingað til í Orlando.
En er nú farin í pottinn og skrifa meira síðar þegar ég verð í stuði.
Floridakveðja Eva

Er kominn á klakann og er kominn í vinnu tær snilld
Fékk afleysingarvinnu á Skíðasambandinu í 3-4 vikur meðan Þórunn fer í frí. Er mjög ánægð með það að vera hér því Mundi er á ferðinni í allt sumar hringinn í kringum landið með útlendinga. Hann er búinn að fara 3 hringferðir og á örugglega eftir að fara fleiri. Ég er flott á því er á hóteli í sumar    gisti á Öngulstöðum þegar ekki er allt fullt þar, þá flyt ég mig til vina og vandamanna. 
Ég kom norður á Yaris sem Hulda og Gústi eiga og vona að ég fái að hafa hann sem lengst, það er frábært að skottast um á svona smábíl og þegar maður er vanur að vera sjálfs sín húsbóndi þá er eiginlega nauðsynlegt að vera á bíl. Freyja og Steini eru að hugsa um að koma út í september og fram í byrjun október með Heiðar Magna sem er alveg frábært og ég hlakka mikið til.   Það er eins gott fyrir þau að drífa sig núna því hún er ófrísk og ætlar  að eiga í Janúar svo kannski komast þau ekki alveg aftur á næstunni, maður veit aldrei. Það er semsagt að bætast í fjölskylduna fjórða barnabarnið svo maður verður bara ríkari og ríkari.
Kveðja að norðan Eva.

Hef gert lítið annað undanfarna daga en að spila golf en nú fer því að ljúka því þau sem ég spila með fara heim á föstudag. Ég þarf líka að fara að undirbúa  heimför sem er á mánudag .
Þetta er búið að vera ágætt sérstaklega þar sem ég hef getað stytt mér stundir með golfi síðustu viku þetta er nú meiri tímaþjófurinn  allavega ekki fyrir vinnandi fólk að stunda þetta, það fer bara allur dagurinn í þetta. Fyrst þarf að koma sér á staðinn og síðan fara 4 tímar í hringinn og síðan að koma sér heim aftur, sex tímar lágmark.  En nú á að fara síðasta hringinn í bili og síðan í Florida Moll að kaupa það sem kaupa á fyrir heimför.
Floridakveðja Eva

Já dagur 3 að kveldi kominn og ég ætla að halda nokkurskonar dagbók hérna svona mest fyrir mig sjálfa.
Allavega eldsnemma á sunnudagsmorgun þá keyrði ég Munda á MCO og ég fór ekkert að gráta Þann dag væblaðist ég um og ákvað síðan kl. rúmlega 3 að drífa mig niður í Alafaya og fara í ræktina þar, dugleg. Ekki var nú listin uppá marga fiska þann daginn en það er svo sem í lagi.
Annan daginn var ég á netinu og sá að það er hægt að fá 7 daga passa frítt í þessu Anytime Fitness sem er hérna í lengjunni hjá Publix. Var fljót að skrá mig og fór á mánudag og síðan í dag þriðjudag og er búinn að heita sjáfri mér að fara alla 7 dagana til að nýta þetta. Verst er á kvöldin að vera svona ein það er þá skömminni skárra að hafa kallinn sér við hlið
Á morgun miðvikudag ætla ég að þrífa sundlaugarnar og fara síðan niður í Ventura og vita hvort ég hitti eitthvað fólk að tala við, það er svo ansk.leiðinlegt að tala bara við sjálfa sig allan daginn, þó skemmtileg sé
Er stöðugt að hugsa fyrir heimferð og byrjaði í dag að þrífa og búa um rúm því húsið verður í leigu einhverjar vikur í sumar sem þýðir  $$$ á reikninginn.
Einmana kveðja úr sól og alltof miklum hita.
Eva

Ákváðum í svona bríaríi að fara til Houston Texas í heimsókn til Fjólu og Hallgríms sem við rétt svo könnuðumst við síðan í RT í gamla daga en svona er í útlöndum það eru allir velkomnir í heimsókn. Ég hitti Fjólu þegar þau komu til Orlando í vinnuferð fyrir 2 mánuðum síðan og hún sagði að  við  værum velkomin, passa sig ekki segja svona þegar við erum annarsvegar. Allavega þá ákváðum við að fara í hjólaferð til Houston Texas þann 1.júní. Við ákváðum að taka 3 daga í ferðina vestur sem voru litlar 1034 mílur ég hélt að það væri nú ekki mikið mál. Mikið er gott að vita ekki hvernig hlutirnir eru fyrirfram. Við keyrðum semsagt rúmar 400 mílur fyrsta daginn síðan rúmar 300 mílur hina tvo og ég var bara búin á því get ég sagt ykkur. Síðan vorum við í sóma og yfirlæti hjá þeim í Texas á laugardag og sunnudag. Þau, Fjóla og Immi eru búin að búa þarna í 11 ár og hann er að gera það gott í framleiðslu á einhverskonar tracking systemi fyrir vörubíla, kann nú ekki mikið að segja frá því en allavega þá hafa þau það bara gott og stelpurnar þeirra eru uppkomnar önnur búin með háskóla og hin í háskóla. Fjóla var að vinna sem deildarstjóri í Target en fékk í bakið þurfti að hætta þar  og er núna að vinna á skrifstofunni hjá Imma.
En allavega ég hugsaði alla helgina hvernig ég kæmist hjá því að fara til baka á hjólinu, hvort það væri bara ekki hægt að senda það og við myndum fljúga Hvort það væri ekki hægt að leigja sendlabíl og setja hjólið í hann og við keyra En síðan var að taka í horn á geitinni og fara af stað á mánudagsmorgun. Við ákváðum strax að taka fjóra daga í heimferðina sáum að við höfðum tekið þetta alltof bratt á vesturleiðinni. Við fórum síðan ekki eins mikið af hraðbrautum heim og fórum hægar yfir og stoppuðum oftar.  Þetta gekk svona líka ljómandi vel og ekkert kom uppá á leiðinni, þetta hjól er náttúrlega bara snilld. Það fékk bara bensín á 140mílna fresti og ekkert annað
Við gistum á hótelum sem staðsett eru allstaðar meðfram veginum og þau eru hvert öðru betra þó það sem var í Lafayette í Lousiana hafi staðið uppúr enda bara opnað fyrir tveimur vikum síðan, semsagt glænýtt.
Dagurinn var svona 6-11 tímar á ferðinni og síðan var farið á hótel í sundlaugina og slappað af yfir sjónvarpi um kvöldið. Ekki mikið næturlíf í þessari ferð
Dagurinn hófst á misgóðum morgunverði á hótelunum og síðan var haldið af stað. Stoppað á svona klukkutímafresti og keypt einn blár Powerade og tveir vatn. Síðan um miðja dag þá var splæst í 2-3 ostborgara á MCdonalds sem kosta 99 sent.  Á kvöldin var snarlast inná herbergi nema eitt kvöldið þá fórum við út að borða á Chillys sem var í næsta húsi og þá var það tveir fyrir einn. Ótrúlega hagsýn í þetta skiptið og ákváðum að eyða eins litlu og hægt væri.
Þessar hugleiðingar eru ekki síður fyrir mig til að muna hvað maður var að gera þennan yndislega tíma á hjóli um fimm fylki Ameríku, Florida, Alabama, Lousiana, Missisippi og Texas.

Hvað á það að þýða að loka söluveri Símans á Akureyri ? Hvað sparast mikið með að segja 8 ungmennum upp hérna norðan heiða en halda svo að segja óbreyttu í Reykjavík að sjálfsögðu. Mér þætti fróðlegt að sjá hvað þetta hefur kostað Símann á mánuði eða ári. Þetta fólk var að selja þjónustu og fá fólk í nýja þjónustu hjá Símanum og stunda beina sölumennsku. Hvaða lógik er að segja því upp þegar Síminn er að missa markaðshlutdeild. Síðan horfir maður á þessar "ódýru" auglýsingar hjá Símanum oft oft á kvöldi og hugsar með sér ef þeir slepptu annari hverri þá næði það kannski upp í kostnaðinn við að halda söluveri sem ég er viss um að skilar meiru en auglýsing í ljósvakamiðli sem erfitt er að mæla áhrif af. Bein sölumennska ef söluaðilinn er að standa sig skilar sér og þar er hægt að mæla hvernig gengur. Ég veit að þau voru að standa sig hérna í söluverinu því mér er málið skylt bæði Jói og Helena voru að vinna þarna og standa sig eins og hetjur.  Ég hef nú alltaf verið frekar hliðholl undir Símann og öll fjölskyldan en þarna er höggvið í rangan runn að mínu mati og veit ég ekki hversu góður talsmaður Símans ég og mín fjölskylda verðum eftir þessa síðustu uppákomu. Ég veit vel að það var fleirum sagt upp en mér finnst þetta hljóti að hafa verið röng ákvörðun miðað við það sem ég segi að ofan um markaðshlutdeild og sölumennsku.
Reið yfir að mér finnst röngum ákvörðunum.
Eva

Ákvað að setja nokkur orð á blað hérna mér og fjölskyldunni til skemmtunar eða hitt þá heldur. Þetta verður svona nokkurskonar dagbók.
Síðan síðast hefur ýmislegt á dagana drifið, veturinn 2009-2010 frá sept til apríl var Mundi að vinna í Noregi ásamt 20 ísl.rafvirkjum í gasvinnslupalli sem var verið að smíða í skipasmíðastöð á eyjunni Stord milli Bergen og Stavanger. Hann kom heim 2 á þessum tíma og ég fór út 2 fyrst um haustið og síðan á þorrablót í febrúar. Í febrúar lok fór ég síðan til Orlando með Drífu og Hildi hans Ara Fossdal og Mundi kom frá Noregi til að losa okkur við langtímaleigjendur í Goostry sem voru vægast sagt búnir að velgja okkur undir uggum þessa 8 mánuði sem þau voru í húsinu. Allavega þá losnuðum við við þau og tókum húsið í gegn og þrifum allt hátt og lágt, það er síðan hitt málið með greiðslu fyrir leigu sem þau eru nú ekki enn búin að ganga frá
Vinnunni hjá Munda lauk svo fyrir páska og þá kom hann heim og hefur verið að leyta sér að atvinnu síðan.  Það er skemmst frá því að segja að ég er líka orðin atvinnulaus og hef verið síðan Tréborg fór um koll í september 2010.  Við tókum okkur til og losuðum húsnæðið í Njarðarnesi og settum það í leigu áfram til Ölfu innréttinga.  Við erum í því að sækja um vinnu sem auglýst er og Mundi er að reyna að skapa sér vinnu með því að kaupa bíla , reyndar bara keypt tvo á uppboði og gert við þá og síðan selja þá. Annar er seldur og hinn í vinnslu. Við erum einnig með Hvammshlíðina á sölu og ætlum að sjá hvort það er einhver kaupandi að henni til að komast í minna húsnæði því við erum bara orðin þrjú í heimili.
Helena og Jói fóru að búa í sumar í Keilusíðunni sinni og þá komu Freyja og Steini með Heiðar og bjuggu hjá okkur um tíma. Þau keyptu síðan í Smárahlíð litla íbúð og fluttu í byrjun september 2010. Þannig að nú er kominn tími til að selja þetta hús sem er of stórt fyrir okkur.
Ákveðin í að blogga aðeins meira og jafnara mér og öðrum til yndisauka.

Það eru allir farnir að vera á Facebook svo það nennir sjálfsagt enginn að lesa neitt á bloggi núna. En fyrir mig og þá sem vilja.
Mikið rosalega er ég orðinn leið á þessum fjármálaspekingum eins og þessum gjörningum sem þessir sérfræðingar eru að gera. Þetta með Exista núna og í desember hvað er þetta eiginlega
Af hverju megum við ekki bara eiga þessi bréf okkar í friði eða það sem hefði verið enn betra að eiga bara í Skiptum/símanum sem við áttum í upphafi. Af hverju þarf endalaust að vera að taka þetta af okkur smælingjunum. Maður er kominn með uppí kok af þessu
Látið okkur bara í friði með þetta og reynið að einbeita ykkur að því að reka þessi fyrirtæki skynsamlega en ekki með þessum eilífðar gjörningum með tölur fram og til baka út og suður.
Það er búið að eyðileggja trú okkar á öllu sem heitir fjármálamarkaður og hlutabréfaviðskipti því það er allt blöffað fram og til baka. Hvað var t.d búið að skrúfa upp þessi Exista bréf þegar skipt var á þeim og bréfum í Skiptum að okkur forspurðum. Við neituðum en það var samt gert í krafti einhverra laga sem misvitrir menn hafa sett og ekki hugsað til enda.
Ég er allavega reið og súr og er búin að heita því að aldrei aftur skal ég vera svo vitlaus að fjárfesta í hlutabréfum og hana nú
Kveðja frá reiðri húsmóðir að norðan.

Eva og co.

Það er komið langleiðina í apríl og enn snjóar og snjóar. Hvenær endar þetta og páskahretið kannski eftir. Nenni þessu ekki.
Ekkert að frétta en mátti til að skrifa amk 2 blogg í þessum mánuði sem er alveg að líða.
Hrefna og hennar hópur eru að fara til Orlando á morgun vildi ég nokkuð vera með eða hvað .
En allar utanlandsferðir bíða betri tíma og við sjáum til. Dagarnir teknir svona hæfilega erfiðlega en við höfum reynt að fara í líkamsrækt daglega í miðri viku og sund þess á milli erum við ekki dugleg
Annars verður maður að gera eitthvað af sér um páskana annars myglar maður endanlega
Orðinn frekar þreyttur á misvísandi fréttum um hvað skal gera fyrir landann og bæta fyrir þetta tjón sem nokkrir misvitrir einstaklingar gerðu okkur hinum.  Er búin að ákveða að þegar ég eignast peninga aftur þá ætla ég aldrei að kaupa mér hlutabréf og hana nú. Enda veit ég ekki hvað svona áhættufælinn manneskja einsog ég var að þvælast þar á þeim miðum.
Það er nú meira hvað tíminn er fljótur að líða annars það er alltaf föstudagur þegar maður er búinn að snúa sér við í byrjun viku, úps búin komin helgi.

Kveðja úr endalausum snjó á Akureyri.
Eva og co.

Kannski ekki alveg eins skemmtilegt og myndin en ein heima í dag og síðasta sólarhring.  Mundi og Ágúst fóru í ferð uppá hálendið og koma seint í kvöld til baka. Þetta er ferð á vegum 4x4 og kallast Miðjuferð þar sem farið er inná miðju Íslands.
 Þau eru nú einhversstaðar á svæðinu Helena og Jói en voru úti í gærkveldi og hafa ekkert verið heima í dag. 
Annars var ég voða dugleg í morgun og fór í Body step en byrjaði svo að hnerra og hnerra og er búin að vera eins og aumingi síðan í morgun með nefrennsli og hnerra.
Þetta var nú ekki planað að fyllast af kvefi núna.
Annars er búið að snjóa og snjóa í allan dag ég veit ekki hvar þetta endar með þennan vetur hann ætlar að endast frekar lengi að mínu mati. Það er nánast búið að vera frost síðan í byrjun janúar  
Annars er allt meinhægt og mamma og Sverrir ennþá í Florida og koma ekki fyrr en 22 mars til landsins og verða þá búin að vera í 9 vikur að spóka sig í Orlando.
Goostry verður í leigu til 11 apríl í þessari atrennu og svo eitthvað í sumar líka sem er mjög gott.

Kveðja úr snjónum á Akureyri.
Eva og co.

Við sitjum hérna tvö ein hjónakornin og horfum á Idol og fleira skemmtilegt.
Ágúst á samfés, Helena að vinna,Jói á meiraprófsnámskeiði og Freyja og Heiðar fyrir austan.  Steini er að vinna þar svo nú fer ég að hætta að telja hann með 

Þetta er mjög skrítið, ég fór í Hagkaup og keypti mat handa okkur tveimur og sagði við minn,nú býð ég í mat. Eldaði Svínalundir með mexico osti og sveppum og kartöflubáta með, umm bara gott
Hrefna systir hefur alltaf sagt að við þyrftum svo lítið í mat miðað við hennar fjölskyldu og nú ætla ég að setja fyrir ykkur þetta próf. 
Ég keypti 560 gr. af kjöti og forsoðnar kartöflur við vorum 2 og borðuðum helming af kjötinu semsagt ca 300 gr.saman og kartöflur og salat.    Og eins og sumir segja er þetta mikið eða lítið ?
Mér finnst þetta frekar lítið miðað  við ráðlagðan dagskammt svo maður verði nú fræðilegur.
En þetta er meira en nóg fyrir okkur,  og nú er komið að mínum, þegar við verðum ein næst þá sér hann um eldamennskuna og ræður matnum, bara svona uppá grín til að prófa.
Annars fréttir:   ha ha, engar bara þetta sama venjulega, ég að vinna svona þegar mér hentar þ.e ég veit nákvæmlega hvað þarf að gera og hvenær og mæti þegar ég þarf og þegar eitthvað er að gera. Smáinnslag; Við farin að smíða líkkistur á Tréborg og það gengur svona líka glimrandi vel. Því eins og menn segja eins dauði er annars brauð.
En lífið gengur sinn vanagang ef hægt er að tala um það þegar maðurinn er atvinnulaus   og framhaldið er ekki áakaflega bjart.   
Bara flytja til Florida þar er þó allavega bjart og hlýtt svona alla jafna.  

Annars bara á lífi og ætla að vera það um ókomna framtíð
Kveðja Eva og co.

Sit og hlusta á Silfur Egils. Þetta eru búnir að vera erfiðir dagar síðan ósköpin dundu yfir okkur í símtali til Florida.
Enn er verið að skoða hug sinn og reyna að skilja þennan gjörning og púsla saman málunum.
Ég skal viðurkenna að þetta kemur alveg rosalega illa við mig og ég er búin að taka þetta mjög nærri mér. Mundi er bara sterkari og tekur þessu með meira æðruleysi ef hægt er að segja það um þetta.
Ég veit ekki hvenær ég get þokað þessu úr huga mér en þetta mun örugglega sitja í mér  um ókomna framtíð. Þannig að þessir einstaklingar sem tóku þessa ákvörðun á svona smekklegan hátt verða bara að hafa það á samviskunni og ætla ég að vona að þeir hugsi sinn gang.
Það er farið að lengja daginn og það kannski hjálpar eitthvað til við að takast á við þetta og svo verðum við að reyna að rífa okkur upp og snúa okkur að einhverju öðru í lífinu.

Reyni að vera meira uppörvandi næst.
Kveðja Eva og co.

Við erum búin að velta þvílíkt vöngum yfir þessari uppsögn og komumst bara ekki að neinni niðurstöðu. Hvað gerðist, hverslags vinnubrögð eru þetta. Kalla á fund þegar maðurinn er ekki við og framkvæma þetta einsog í skjóli myrkurs. Ekki gefa honum möguleika á að vera þarna og standa fyrir máli sínu. Ég er í losti og við skiljum hvorki upp né niður í málinu.
Hvað er hátternisvandamál eins og sagt var í frétt á stöð 2. Fór hann of hratt fyrir þeirra smekk og því var þá ekki talað við hann ?  Mér finnst einhver skulda honum skýringu á þessum gjörningi. Allir sem við höfum talað við hafa borið honum vel söguna og hvernig má þá þetta vera.  

Kveðja Eva og co.

Sagði í síðasta bloggi að þetta ár gæti nú ekki orðið verra en lokin á því síðasta. En viti menn við í Florida og þá kemur uppsögn einsog þruma úr heiðskýru lofti og minn orðinn atvinnulaus
Hvað er í gangi, mátti ekki bíða með þetta þangað til hann kæmi heim og leyfa honum að bera hönd fyrir höfuð sér og skýra sitt mál. Hvað lá svona á?  Við vitum ekkert hvað gerðist og hvers vegna þetta er svona.
Þetta er ákaflega skemmtileg upplifun svona í 50tugs afmælisferðinni minni. Og þá er að fara í Pollýönnu gírinn og finna hvað getur komið gott út úr þessu. Ég er ekkert vilholl en ég held að þetta séu stór mistök hjá þessu blessaða fólki þarna fram í firði. En það verður að eiga það við sig og sína samvisku að standa svona að málum.

Annars er allt 'meinhægt'  hérna og hiti rétt yfir frostmarki

Þar til síðar.
Eva og co.

Það er eins gott að þetta ár verði betra en það síðasta   Allavega held að það geti ekki verið verra en endirinn á því ári.
Upphafið var reyndar snilld og alveg fram í septemberlok.
En með nýju ári koma vonandi breyttir siðir og var nú kominn tími til.
Fór í ræktina í gær í fyrsta skiptið í heilan mánuð og erum búin að fara nokkru sinnum út að labba um jólin og áramótin þannig að þetta var nú ekki bara að liggja á meltunni eins og stundum ó nei.
Nú er planið sett á einkaþjálfun hjá eldri dótturinni og leyfi ykkur að fylgjast með hvernig henni tekst að skóla pabba og mömmu til svona á gamals aldri.
Annars nálgast 12.janúar óðfluga og þá kemst mín á sextugsaldur úff.
Það er víst ekkert alslæmt allvega hefur minn ekkert versnað við þann áfanga sem hann náði fyrir einu og hálfu ári síðan.
Í tilefni afmælisins ætlum við að skreppa (þið megið geta hvert) í viku og sjá svo til þegar til baka er komið hvort við höldum uppá herlegheitin, það verður komið fram undir mánaðarmót og kannski betra hljóð í öllum, þar á meðal mér
En skrifa meira þegar ég verð kominn í sólina og hitann sem þið megið öfunda mig af.

Kveðja Eva og co.